¿QUES DESCUBRIL UN SECRETU? Sólu tes que sabel miral...

 En colaboración con as familias, us alumnus/as de 5 anus estamus cuñucendu nosu lugal i por isu nus fuimus de ruta por “Valverdi du Fresnu” a ficel fotus.

A primeira pará foi na Iglesia de “Nosa Señora da Asunción”. Por sorti está cerca da escuela i au lau de ela está a Crú du Forti, dondi nus gusta xugal cuandu semus du cole.

Otru lugal que nun podía faltal e a Plaza da Constitución, alí se celebran festas divertías, comu as verbenas, u Carnaval, a festa de San Blas i pasan “coisas” importantis ya que alí aparca u trineu Papá Noel i ponin u buzón us Reyis Magus.

U tercer sitiu foi a Casa da Cultura; e un edificiu grandi, dentru está a biblioteca i  un salón enormi dondi bailamus en Navidai.

Quizás esti últimu inda e mais importanti que a Plaza porque alí han estau us Reyis Magus dándunus regalus i caramelus. Por fora du edificiu nus ficimus unha fotu i quedó mui chula con as letras du lugal.

Temus que dar as gracias a nosas familias, por acompañarnus a cuñucel miyol estis rincóns i ficel estas fotus, que nus gustará volvel a vel cuandu pasin us anus.

Pero, te preguntarás… ¿Qué ten que vel to istu con un secretu? ¿ I con sabel miralo…?

Es que nosa aventura non acaba aquí…

Nu cole hemus queríu expoñel estas fotus tan bonitas i ya que esti cursu a coisa vai de “arti”, u hemus relacionau con u proyectu de Hervé Tullet (du que ya falimus otru día).

Así que hemus feitu unhus cubus colgantis que escondin palabras secretas, escritas con tinta invisibli i que a única forma de leelas e con unha linterna mágica.

¿Vus imagináis en qué lengua están escritas?

Us compañeirus/as de primaria ya han estau investigandu por sua conta.